Presentación

Tendo como perspectiva a celebración do 17 de maio, por un lado por ser o Día das Letras Galegas e por outro lado por ser o Día Internacional contra a homofobia, transfobia e bifobia, esta Situación de Aprendizaxe (SA) dá inicio ao terceiro trimestre do curso e busca reforzar a idea de que somos DiverSOS, pero a nosa diversidade está ameazada pola uniformidade da globalización. No caso das linguas, a través da imposición das hexemónicas, especialmente o inglés e no noso caso ademais o español. Para chegar a esa conclusión o alumnado deberá responder á pregunta "E ti como falas?" a través dunha pequena reportaxe. Esta SA xira arredor da necesidade de preservar a variedade lingüística e a diversidade cultural asociada ao multilingüismo, para o que é preciso derrubar prexuízos e construír unha conciencia lingüística que xere actitudes e comportamentos normalizadores daquilo que está invisibilizado e minorizado, pois os aspectos lingüísticos irán da man doutros aspectos sociais como a necesidade de respectar a diversidade sexual e de xénero.

Ademais, esta SA ten como fin reclamar o ODS 18, que pretende reivindicar e garantizar a presenza e o recoñecemento de todas as linguas e culturas na Axenda 2030 para o desenvolvemento das persoas e das sociedades.

As competencias en cuxo desenvolvemento se incidirá especialmente son a CCL, CP, CC e CCEC.

1. Tarefa Inicial. Coloquio. E ti como falas? Uniformidade ou variedade?
   
2. Actividade 1. Análise dialectal dun texto.
3. Actividade 2. Análise fonética e/ou fonolóxica dun texto.
4. Actividade 3. Análise de desvíos normativos nun texto.
5. Actividade 4. Análise morfosintáctica ou gramatical dun texto. (Reforzo)
6. Actividade 5. Análise lexico-semántica dun texto. (Reforzo)
7. Tarefa Final. Análise lingüística e dialectal dun texto.

Actividade autónoma. A través desta actividade o alumnado responderá á pregunta inicial E ti como falas?, realizando unha pequena reportaxe con entrevistas a persoas da súa contorna, para descubrir os prexuízos arredor da normativa oficial e para inferir a variedade dialectal das persoas entrevistadas co obxectivo de concluír que somos DiverSOS.

Proba. Ao final da SA, o alumnado deberá confeccionar e realizar unha proba, como tarefa de reforzo.

Dúas son as finalidades que persegue esta tarefa:

1. Reforzar as destrezas e os saberes adquiridos ao longo da situación de aprendizaxe, para mellorar o desenvolvemento competencial, especialmente o referido á CCL.

2. Practicar o modelo de proba PAU (neste caso das preguntas 2 e 3).